Entrevista con estudantes brasileiros en Santiago de Compostela

Para rematar as clases de Sistemas Urbanos, este venres pasado tivemos a oportunidade, grazas ao noso compañeiro Washington, de poñer en contacto a cultura galega coa percepción dos estudantes brasileiros na cidade de Compostela.

Mediante a técnica do focus group estivemos durante máis de 2 horas empapándonos das vivencias dos alumnos brasileiros entorno a cuestións coma o noso sistema urbano, a nosa cultura e outros temas que hei de ir desenvolvendo a continuación.

Contamos coa presenza de catro alumnos do país americano; estudantes de dereito, xeografía, traballo social e química. Coa súa experiencia actual na cidade de Santiago fomos sacando unhas conclusións que vos faremos chegar para invitarvos a reflexionar sobre a percepción que existe da idiosincrasia galega.

Santiago de Compostela é singular, bonita e limpa. Así nola describen os alumnos brasileiros, sendo en xeral unha cidade distinta das súas de orixe; destacando a gran presenza de zonas verdes e parques.

En relación aos temas que lles fun desenvolvendo eu, determinando a miña entrevista cara cuestións sobre a cultura galega, a percepción dos asentamentos, as cidades galegas e a gastronomía. Por outra banda, tiven tamén a oportunidade de saber que opinan do sistema universitario de Galicia.

A maioría dos entrevistados visitaron cidades galegas como Lugo, A Coruña ou Vigo; e destinos turísticos relevantes como Fisterra. En referente ás cidades galegas, achégannos a mesma opinión, cidades pequenas, limpas e bonitas. Malia isto afirman que non viaxan moito pola xeografía galega.

Tiven a oportunidade de interrogalos sobre o seu parecer do que era o rural galego; salvo unha rapaza que tiña contacto con A Estrada o resto descoñecían por completo esta área. Como empezamos a vislumbrar a maioría dos rapaces teñen os intereses postos fóra de Galicia .. Pero cara onde? Resulta curioso o seu interese por coñecer Europa e o resto de España antes incluso de coñecer o lugar onde residen.

Esta aparente desconexión figura no seu baixo interese pola cultura e as manifestacións culturais; afirmando que a maioría dos Erasmus teñen pouco interese en coñecer a cultura galega. E isto porque ocorre?

Segundo eles, a oferta cultural galega é baixa, pode que sexa froito do seu propio descoñecemento e desinterese... Non podería asegurarvolo.

En canto á lingua galega, dicir que non lles supón un problema, mais prefiren practicar español. Anecdótico resultou a confesión dunha rapaza que cando falou da nosa lingua no seu país a confundiron co idioma galés, no Reino Unido. Apostan tamén pola creación de máis clases de galego ou cursos básicos de inmersión. Non observan no seu país a mesma afinidade lingüística que nós manifestamos moitas veces. 

A súa inmersión na gastronomía galega moitas veces dilúese coa española, misturando tortilla con marisco e paella. Din que gustan moito o marisco, con excepcións claro está. 

Paso por paso, para a rapaza que estudaba Química, afirmaba que o nivel é parecido ao do Brasil, malia distinguía que no Brasil teñen máis prácticas en empresas.

A estudante de Traballo Social ratificaba que existía máis calidade no ensino en Santiago que no seu país de orixe, cunha mellor estrutura; mais que quizais nos perdemos un pouco pola parte teórica. 

Para o rapaz de dereito, a súa carreira no Brasil e en Galicia son similares, cunha metodoloxía semellante, aínda que destaca que en Santiago temos unha facultade só para o dereito, cousa que na súa Universidade non ocorre.

A conclusión que sacamos en limpo é que o sistema de Graos quítalle moito tempo ao estudantado; que con tantos traballos non dispoñen de tempo para desenvolver actividades paralelas como a investigación, as visitas a empresas. Destacan tamén que non hai integración apenas entre o alumnado e o profesor.

Resaltan tamén a falta de interese do alumnado por Congresos e publicación de traballos, ámbito no que podemos implicar á Universidade tamén. 

Pois ben, logo desta breve presentación, non me vou extender moito máis, achégovos as conclusións da miña parte de entrevistas:

- Desconexión entre o estudantado de Erasmus e o sistema cultural galego.

- Falta de interese moitas veces de ambos bandos por achegarse.

- Unha Universidade que mostra nos aposta pola integración do estudantado estranxeiro na sociedade.

- Existencia de algunhas lagoas sobre o que é a nosa cultura de cara o ámbito internacional.

- Fracaso do sistema de graos e do Plan Boloña

As miñas conclusións resúmense en cinco principalmente, pero, vós opinades o mesmo? Credes que existen diferenzas insalvables entre os Erasmus e a poboación galega? Que opinión vos esperta a súa concepción do sistema universitario galego? Credes que a cultura galega se vende mal ao redor do mundo? Compartides o seu parecer de que a Universidade de Santiago os esquece un pouco e non aposta por integralos?

Boa tarde!